E Solarträker esch e mechanischi Konschtrukzion wo eis oder au mehreri Solarpänel nach der Sonne usrechtet. Dodure werd d'Energiprodukzion em Verglich zu fescht montierte Pänels wesentlich erhöht. Me ongerscheided eiachsig- und zwöiachsig nochegfüehrti Sischtem. Be der usrechtig vo Oschte nach Weschte sprecht me vom "Azimut", bem Wenkel, Pänel zum Bode, vor "Elevation".

Nach velle velle Stong, oder besser gseit Täg han eg me entschede dases för mini Semeschterarbeit söu e Kombination gä... mer mache nume ei Bewegig, aber wöumer e gschekti Konschtrukzion mache verstöue mer trotzdem "Azimut" und "Elevation".

Äntli esch der erschti Schrett gschafft, eg han höt mini Semeschterarbeit abgä, der Solartracker esch auso mechanisch fertig ufbout ond d'Dokumentation met Plän und Pflechteheft erstöut. För d'Präsentation vo euisne Arbeite im Netz hei mer es Pdf möse abgä, das wär den DAS gsi.

Wonderbar, es esch weder chli Zit versrteche und jetz hanig au scho mini Diplomarbeit abgä und präsentiert. Het d'Semeschterarbeit be euich chli inträsse gweckt, denn gächs i dere Churzfassig do no um d'Software för mi Solartracker, ebe um mini Diplomarbeit.